အဂတိမှုဖြင့် ကျေးလက်လမ်းဖွံ့ဖြိုးရေးဦးစီးဌာနမှ စာရေးမတစ်ဦးကို ရုံးထုတ်စစ်ဆေး

အဂတိအမှုဖြင့် တရားစွဲဆိုခံထားရသည့် မန္တလေးတိုင်းဒေသကြီး၊ ကျေးလက်လမ်းဖွံ့ဖြိုးရေးဦးစီးဌာနမှ ဌာနခွဲစာရေးမတစ်ဦးအား ဒီဇင်ဘာလ ၂၇ ရက်၊ နံနက် ၁၁ နာရီက မန္တလေးတိုင်းဒေသကြီး တရားရုံးမှာ တတိယအကြိမ်မြောက် ရုံးထုတ်စစ်ဆေးခဲ့သည်။

ယနေ့ ရုံးထုတ်စစ်ဆေးမှုတွင် ငွေကြေးပေးခဲ့သည့် တင်ဒါအောင်ကုမ္ပဏီများမှ တာဝန်ရှိသူ ၂ ဦးကို စစ်ဆေးခဲ့ခြင်းဖြစ်သည်။

ငွေပေးခဲ့ရသည့် တင်ဒါအောင်ကုမ္ပဏီတစ်ခုမှ တာဝန်ရှိသူတစ်ဦးက ” ကျွန်တော်တို့ တကယ် ပေးခဲ့ရတယ်။ ဒီနေ့လည်း ပေးရတယ်ဆိုတဲ့အကြောင်း ဒီအတိုင်းပဲ ပြောရတာပါပဲ။”ဟု ပြောသည်။

မန္တလေးတိုင်းဒေသကြီးအတွင်း ကျေးလက်ဖွံ့ဖြိုးရေးလမ်းများ ပြုလုပ်ရန် တင်ဒါအောင် ကုမ္ပဏီ ၃၀ ကျော်ရှိပြီး ကုမ္ပဏီအားလုံးနီးပါး ငွေပေးခဲ့ရသည်ဟုလည်း ငွေပေးခဲ့ရသည့် ယင်းကုမ္ပဏီတာဝန်ရှိသူက ဆိုသည်။

၂၀၁၇/၂၀၁၈ ဘဏ္ဍာရေးနှစ် ပြည်ထောင်စုရန်ပုံငွေဘတ်ဂျက်နှင့်တိုင်းဒေသကြီးအစိုးရရန်ပုံငွေဘတ်ဂျက်တို့မှ ကျေးလက်လမ်းလုပ်ငန်းများ တင်ဒါခေါ်ယူဆောင်ရွက်ရာတွင် လုပ်ငန်းပြီးစီးမှုအရ ၂၅ ရာခိုင်နှုန်းကို လုပ်ငန်းတန်ဖိုးငွေအဖြစ် ခွဲဝေထုတ်ပေးခဲ့သည်။

ခွဲဝေရာတွင်မန္တလေးတိုင်းဒေသကြီး၊ ကျေးလက်လမ်းဖွံ့ဖြိုးရေး ဦးစီးဌာနမှ ငွေထုတ်သူအရာရှိ တိုင်းဦးစီးမှူး ဒုတိယညွှန်ကြားရေးမှူး ဦးအောင်မြင့်ကျော်နှင့် ဌာနခွဲစာရေး ဒေါ်သူဇာတို့သည် လုပ်ပိုင်ခွင့်အာဏာကို အလွဲသုံးစားပြု၍ တင်ဒါအောင်မြင်သော ကုမ္ပဏီ ၆ ခုထံမှ လုပ်ငန်းပြီးစီးမှုရာခိုင်နှုန်းအလိုက် ထုတ်ပေးရမည့် ငွေများထဲမှ ၃ ရာခိုင်နှုန်း ဖြစ်သော ငွေကျပ် (၁၀.၂၇၈) သန်း ကျော်အား “ရုံးစရိတ်/ငွေထုတ်စရိတ်” ဟု အကြောင်းပြကာ ဥပဒေနှင့်အညီ ရထိုက်သော အခွင့်အရေးကို မမှန်မကန်ပိတ်ပင်၍ အကြိမ်ကြိမ် အပိုကြေး ဖြတ်တောက် တောင်းခံရယူ၍ အဂတိလိုက်စားခဲ့ကြောင်း စစ်ဆေးပေါ်ပေါက်ခဲ့သည်ဟု အဂတိလိုက်စားမှု တိုက်ဖျက်ရေး ကော်မရှင် ထုတ်ပြန်ချက်အရ သိရသည်။

စစ်ဆေးပေါ်ပေါက်ချက်အရ မန္တလေးတိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာနမှ ငွေထုတ်သူအရာရှိ တိုင်းဦးစီးမှူး ဒုတိယညွှန်ကြားရေးမှူး ဦးအောင်မြင့်ကျော်အား ၂၀၁၃ ခုနှစ်၊ အဂတိလိုက်စားမှု တိုက်ဖျက်ရေး ဥပဒေ ပုဒ်မ ၅၆ အရလည်းကောင်း၊ ဌာနခွဲစာရေး ဒေါ်သူဇာအား ၂၀၁၃ ခုနှစ်၊ အဂတိလိုက်စားမှု တိုက်ဖျက်ရေး ဥပဒေ ပုဒ်မ ၅၆/၆၃ အရလည်းကောင်း အရေးယူဆောင်ရွက်ရန် မြစ်ငယ်နယ်မြေရဲစခန်းတွင် အောက်တိုဘာလ ၃၁ ရက်နေ့က အမှုဖွင့်ခဲ့ခြင်းဖြစ်သည်။

တင်ဒါအောင်မြင်ခဲ့သည့် ကုမ္ပဏီတစ်ခုမှ မန်နေဂျင်းဒါရိုက်တာ တစ်ဦးက “တိုင်းရုံး ရန်ပုံငွေဆိုပြီး တောင်းခဲ့တာပါ။ အရင် ဒါမျိုး မပေးရဘူး။”ဟုပြောသည်။

လက်ရှိ ဌာနခွဲစာရေး ဒေါ်သူဇာကိုသာ စစ်ဆေးနိုင်သေးပြီး ၎င်းနှင့်အမှုတွဲဖြစ်သော တိုင်းဦးစီးမှူး ဒုတိယ ညွှန်ကြားရေးမှူး ဦးအောင်မြင့်ကျော်မှာ လွတ်မြောက်နေဆဲ ဖြစ်ကြောင်းသိရသည်။

လာမည့် ၂၀၁၉ ခုနှစ် ဇန်နဝါရီလ ၁၀ ရက်နေ့တွင် စတုတ္ထအကြိမ် ထပ်မံ ရုံးထုတ်စစ်ဆေးသွားမှာဖြစ်ကြောင်း သိရသည်။

Credit :www.mizzimaburmese.com

Loading...

Facebook Comments